فېصل آباد 18 نومبر (اے پي پي) وزيراعظم عمران خان وئيلي دي چې د پاكستان جامع پرمختګ لپاره به د كال 1960م د لسيزې په صنعتي پاليسي عمل كولې شي او په دې لړ كښې به د صنعتكار په مشوره نوې پاليسي تشكيل كولې شي. ده دا خبرې د شورو په ورځ د فېصل آباد چېمبر دستورې ته په خپله وېنا كښې وكړې. په دستوره كښې د پنجاب ګورنر چوهدري محمد سرور، د پنجاب وزيراعلٰي سردار عثمان بزدار، وفاقي او صوبائي وزيرانو، د اسمبلې غړو او صنعتكارو په لويه شمېره ګډون وكړو. وزيراعظم ووئيل چې د كال 1960م د صنعتي پالېسې په نتيجه كښې پاكستان هغه وخت په تندې سره پرمختګ كولو كله چې په كال 1970م كښې ذوالفقار علي بهټو د اسلامي سوشلزم په نوم صنعتونه په قومي چوكاټ كښې واخستل او دې لپاره ئې دا جواز وړاندے كړو چې د پاكستان ټول دولت تر 22 كورنيو محدود دے. ده ووئيل چې بايد مونږ د قوميانې پاليسي په ځائ اضافي سرمايه په غريب اولس خرڅ كولو لپاره قانون سازې كړې وې. ده ووئيل چې اوس هم د صنعتي پرمختګ ضرورت دے چې دغسې سرمايه كار خپل دولت زياتولو سره سره اضافي سرمايه د خلقو د غربت په ختمولو خرڅ كړي. ده د چين مثال وركړو او وې وئيل چې چين د دې طريقې له مخې صنعتكاري وكړه، اول سرمايه كارو دولت زيات كړو او بيا ئې د 70 كروړ نه زيات خلق د غربت نه رابهر كړل. ده ووئيل چې بايد په هېواد كښې داسې ماحول پېدا نه كړے شي چې زياتې پېسې ګټل جرم وګڼل شي. ده ووئيل چې بايد سرمايه كار په جائز ډول منافع وكړي او بايد حكومت په دې لړ كښې ضروري اسانيې وركړي. د چينې مافيا ذكر كولو سره ده ووئيل چې كمپټېشن كميشن آف پاكستان وئيلي دي چې د چينې ملونو د كارټيلائزېشن د لارې په ګډه د چينې بېعه لوړه كړه او خلق ئې د ګرانې طوفان سره مخ كړل. ده ووئيل چې حكومت به په هېواد كښې د صنعت كارې او د برآمداتو ډاډګېرنه كوي او په دې لړ كښې به زياتې اسانيې پېدا كولې شي. ده ووئيل چې حكومت كاروبار لپاره اسانيې پېدا كوي. په اېف بي آر كښې پرله پسې د اصلاحاتو عمل روان دے. په دې لړ كښې ډېجيټلائزېشن رائج كولې شي. ده ووئيل چې د كووډ په وجه په ټوله نړۍ سخت وخت راغلے، د ټولې نړۍ معيشتونه كمزوري كېږي خو د پاكستان په معيشت كښې تندي راځي. ده ووئيل چې مونږ د سمارټ لاك ډاٶن د لارې نه يوازې غريب خلق بچ كړل بلكې معيشت مو هم بېرته مستحكم كړو. ده په دې لړ كښې د اېن سي او سي ښه پلانونه وستائيل. ده د حماد اظهر او د خپلې معاشي ډلې هم ستائنه وكړه كومې چې صنعتونه د زيان نه بچ كولو لپاره په وخت اقدامات وكړل. ده په دې لړ كښې د سټېټ بانك د ګورنر هم ستائنه وكړه. ده ووئيل چې د صنعتي پرمختګ عمل بېرته بحال شوے خو مونږ ته به د كورونا د دوهمې چپې نه بچ كېدو لپاره په خپله حفاظتي اقدامات كول وي. ده ووئيل چې كه د كورونا رنځوران زيات شول نو په روغتونونو د فشار زياتېدو په نتيجه كښې به په معيشت هم منفي آغېز وشي.
د پاكستان جامع پرمختګ لپاره به د كال 1960م د لسيزې په صنعتي پاليسي عمل كولې شي. د وزيراعظم عمران خان د فېصل آباد چېمبر دستورې ته وېنا
مضمون کا ماخذ : لاہور لاٹری
متعلقہ مضامین
